Bakı şəhəri 78 nömrəli tam orta məktəbdə icra olunan layihə çərçivəsində VIII sinif şagirdləri üçün interaktiv biologiya dərsləri təşkil olunur. Dərslərdə PhET platformasından istifadə edərək şagirdlərin nəzəri bilikləri daha dərindən mənimsəməsi və onları praktik şəkildə tətbiq etməsi təmin edilir. Simulyasiyalar vasitəsilə şagirdlər hüceyrə quruluşu, fotosintez prosesi, genetik qanunauyğunluqlar və digər mövzuları vizual və təcrübəyə əsaslanan yanaşma ilə öyrənirlər. Bu metod onlara biologiyanı yalnız əzbərləmək deyil, real həyat nümunələri ilə dərk etmək imkanı yaradır.

Bundan əlavə, dərslər ünsiyyət, tənqidi düşüncə, problem həll etmə və komanda işi bacarıqlarının formalaşdırılmasına yönəlib. Layihə çərçivəsində şagirdlər tədqiqat aparmaq, fərqli yanaşmaları müqayisə etmək və nəticələr çıxarmaq kimi mühüm bacarıqlara yiyələnirlər.

Layihə çərçivəsində indiyə qədər 24 saat dərs keçirilib və şagirdlər artıq PhET platformasından istifadə qaydalarını mənimsəyib. Layihə başa çatdıqdan sonra da onlar bu platformadan faydalanaraq yeni bilik və bacarıqlar əldə edəcəklər.